፩ ወእምዝ በሳኒታ አንሶሰወ እግዚእ ኢየሱስ ውስተ አህጉር ወአዕጻዳት ፤ ወሰበከ ሎሙ ወመሀሮሙ በእንተ መንግሥተ እግዚአብሔር ፤ ወምስሌሁ ዐሠርቱ ወክለኤቱ አርዳኢሁ ። ፪ ወአንስትኒ እለ አሕየዎን እምአጋንንት እኩያን ወእምደዌሆን ። ፫ ወእማንቱ ማርያም እንተ ይብልዋ መግደላዊት እንተ ሰብዐቱ አጋንንት ወፅኡ እምኔሃ ፣ ወዮሐና ብእሲተ ኩዛ መጋቢሁ ለሄሮድስ ፣ ወሶስና ወካልአትሂ ብዙኃት እለ ተልእካሁ በንዋዮን ። ፬ ወእንዘ ያጸምዕዎ ኵሉ ሕዝብ ወእለሂ መጽኡ ኀቤሁ እምኵሉ አህጉር ይቤሎሙ ምሳሌ እንተ ከመዝ ። ፭ ወፈረ ዘይዘርዕ ከመ ይዝራዕ ዘርዖ ፤ ወአንዘ ይዘርዕ ቦ ዘወድቀ ውስተ ፍኖት ፤ ወመጽኡ ሰብእ ወኬድዎ ፤ ወበልዕዎ አዕዋፈ ሰማይ ። ፮ ወቦ ዘወድቀ ውስተ ኰኵሕ ፤ ወበቍሎ የብሰ በጊዜሃ እስመ አልቦ ሥርው ። ፯ ወቦ ዘወድቀ ውስተ ሦክ ፤ ወበቍሎ ጠበቆ ሦክ ። ፰ ወቦ ዘወድቀ ውስተ ምድር ሠናይት ፤ ወበቈለሂ ወፈረየሂ ምእተ ምከዕቢተ ፤ ወዘንተ ብሂሎ ይቤሎሙ ዘቦ እዝን ሰሚዐ ወይስማዕ ።