፴፰ ወአሜሃ መጽኡ ሰብእ እምጸሐፍት ወእምፈሪሳውያን ፤ ወይቤልዎ ሊቅ ንፈቅድ እምኀቤከ ትእምርተ ንርአይ ። ፴፱ ወአውሥአ እግዚእ ኢየሱስ ወይቤሎሙ ትውልድ ዕሉት ፤ ወዐማፂት ፤ ወዘማዊት ትእምርተ ተኀሥሥ ፤ ወትእምርትሰ ኢይትወሀባ ዘእንበለ ትእምርተ ዮናስ ነቢይ ። ፵ እስመ በከመ ነበረ ዮናስ ውስተ ከርሠ አንበሪ ሠሉሰ መዋዕለ ፣ ወሠሉሰ ለያልየ ፤ ከማሁ ይነብር ወልደ እጓለ እመሕያው ውስተ ልበ ምድር ሠሉሰ መዋዕለ ፣ ወሥሉሰ ለያልየ ። ፵፩ ሰብአ ነነዌ ይትነሥኡ አመ ዕለተ ደይን ፤ ወይትፋትሕዋ ለዛቲ ትውልድ ፤ ወያስተኀፍርዋ ፤ እስመ ነስሑ በስብከተ ዮናስ ፤ ወናሁ ዘየዐቢ እምዮናስ ሀሎ ዝየ ። ፵፪ ንግሥተ አዜብ ትትነሣእ አመ ዕለተ ደይን ፤ ወትትፋታሕ ምስለ ዛ ትውልድ ፤ ወታስተኀፍራ ፤ እስመ መጽአት እምአጽናፈ ምድር ትስማዕ ጥበቢሁ ለሰሎሞን ፤ ወናሁ ዘየዐቢ እምሰሎሞን ሆሎ ዝየ ።