፲፩ ወኢትትሐመዩ ፡ በበይናቲክሙ ፡ አኀዊነ ፤ እስመ ፡ ዘሐመዮ ፡ ለካልኡ፡ ወዘይግእዞ፡ ሐመዮ፡ ለሕገ፡ እግዚአብሔር ፤ ወይግእዝ ፡ ሕገ ፡ እግዚአብሔር ፤ ወእመሰ ፡ ሕጎ ፡ ትግእዝ ፤ ኢኮንከ ፡ ገባሬ፡ ሕግ ፤ አላ ፡ ኮንከ ፡ ገኣዚሃ ፡ ለሕግ ። ፲፪ እስመ ፡ አሐዱ ፡ ውእቱ ፡ ወሀቢሃ፡ ለሕግ ፡ ወመኩንና፡ ለሕግ፡ ዘውእቱ፡ ይክል ፡ አማስኖሂ፡ ወአድኅኖሂ ፤ አንተኬ ፡ ምንትኑ ፡ አንተ ፡ ዘትግእዞ፡ ለካልእከ ። ፲፫ ከመ ፡ እለ ፡ ይብሉ ፡ ዮም ፡ አው ፡ ጌሠመ ፡ ነሐውር ፡ ውስተ ፡ እንታክቲ ፡ ሀገር ፤ ወንነብር ፡ ውስቴታ ፡ ወንትጌበር ፡ ወንረብሕ፡ ወኢየአምሩ፡ ዘይከውን፡ ጌሠመ። ፲፬ ምንትኑመ ፡ ሕይወትክሙ ፡ አኮኑ ፡ ከመ ፡ ጢስ ፡ አንትሙ፡ ዘለምዕር ፡ ያስተርኢ ፡ ወእምድኅሬሁ ፡ ይማስን ። ፲፭ ዘእምትቤሉ ፡ እመ ፡ ሠምረ፡ እግዚአብሔር ፡ ወሐየውነ ፡ ንገብር ፡ ዘንተ፡ አው ፡ ዝክተ ። ፲፮ ወይእዜሰ ፡ ትትሜክሑ : በምግገባሪክሙ ፤ ወኵላ ፡ ትምክሕት ፡ እንተ ፡ ከመዝ ፡ እኪት ፡ ይእቲ ። ፲፯ ወዘየአምር ፡ ገቢሮታ ፡ ለሠናይት ፡ ወኢይገብራ ፡ ኃጢአተ ፡ ትከውኖ ።